285 кәмелетке толмаған: жолдағы қайғылы статистика ескертеді

Фото: gov.kz

Қазақстан Республикасы Ішкі істер министрлігі Әкімшілік полиция комитеті төрағасының орынбасары Ғалым Сарғұлов Орталық коммуникациялар қызметі алаңында өткен баспасөз конференциясында балалардың жолдағы қауіпсіздігі мәселесі әлі де өзекті күйінде қалып отырғанын айтты, деп хабарлайды Ult.kz.

 285 баланың өмірі – орны толмас қаза

Спикердің айтуынша, балалар – жол қозғалысына қатысушылардың ең осал санаты. Сондықтан олардың өмірі мен денсаулығын қорғау – тек құқық қорғау органдарының ғана емес, бүкіл қоғамның міндеті.
Өткен жылы жол-көлік оқиғалары салдарынан 285 бала қаза тапқан. Сонымен қатар жүздеген бала түрлі деңгейдегі жарақат алған.

"Бұл – жол беруге болмайтын шығын. Біз балаларымыздың өмірі мен денсаулығын сақтау үшін бар күш-жігерімізді салуға міндеттіміз. Зардап шеккен кәмелетке толмағандардың жартысынан астамы көлік құралдарының жолаушылары болған. Қалғандары – жаяу жүргіншілер, оның ішінде велосипедшілер, самокат пайдаланушылар және мопед жүргізушілері", – дейді Әкімшілік полиция комитеті төрағасының орынбасары.

Фото: Ортком

Жаяу жүргіншілердің қауіпсіздігі – ортақ жауапкершілік

Жол-көлік оқиғаларының бір бөлігі жаяу жүргіншілердің, оның ішінде кәмелетке толмағандардың белгіленбеген жерден немесе тыйым салынған бағдаршам белгісінде жолды кесіп өтуінен болады екен. Балалар жол жағдайын әрдайым дұрыс бағалай бермейді. Бұрылыс немесе тоқтап тұрған көлік артынан басқа көліктің кенеттен шығып қалуы мүмкін екенін ескермейді.

Қараңғы уақытта жарық шағылыстыратын элементтердің болмауы да қауіп деңгейін арттырады. Осыған байланысты балаларға жолдан өтер алдында жүргізушімен көзбен байланыс орнатудың, асықпай, мұқият әрекет етудің маңыздылығын түсіндіру қажеттігі айтылды.

"Жол қозғалысы қауіпсіздігі жүргізушілерге де, жаяу жүргіншілерге де байланысты. Тәуекел екі тарапта да бар. Алайда жол-көлік оқиғаларының себептері ретінде жаяу жүргіншілердің, соның ішінде кәмелетке толмағандардың белгіленбеген жерден немесе тыйым салынған бағдаршам белгісінде жолды кесіп өтуі жиі тіркеледі. Балалар кейде жол жағдайын дұрыс бағаламай, бұрылыс немесе тоқтап тұрған көлік артынан көлік кенеттен шығып қалуы мүмкін екенін ескермейді. Қараңғы уақытта жүргізушілерге жаяу жүргіншілерді байқау қиынырақ, әсіресе киімінде жарық шағылыстыратын элементтер болмаған жағдайда", – дейді Ғалым Сарғұлов.

Профилактикалық шаралар күшейтілуде

Ішкі істер министрлігі балалар өлімін және жол-көлік жарақаттануын азайту мақсатында жүйелі жұмыстар жүргізіп келеді екен. Атап айтқанда, «Қауіпсіз мектеп автобусы», «Абайлаңыз, балалар!», «Абайлаңыз – жаяу жүргінші!», «Ата-аналар, балалардың өмірін сақтаңыздар!», «Сіздің жолаушыңыз – бала!», «Мектепке жол» сынды профилактикалық акциялар тұрақты ұйымдастырылып отырғанын Әкімшілік полиция комитеті төрағасы өз сөзінде айтып өтті.

"Сонымен қатар оқу кезеңінде балалардың «үй–мектеп–үй» бағыты бойынша қозғалуына ересектер тарапынан ерекше назар аудару қажет екенін атап өткім келеді. Ата-аналарды, педагогтарды полиция қызметкерлерімен бірлесіп әрбір бала үшін ең қауіпсіз бағытты айқындап, пысықтауға шақырамын. Бұл бағыт тұрақты әрі баланың өзіне жақсы таныс болуы тиіс. Ата-аналарды белсенді болуға және осы бағытта бізбен бірлесе жұмыс істеуге шақырамын. Бірге әрекет етсек, нәтижеге қол жеткіземіз", – дейді Ғ. Сарғұлов.

БАҚ-қа үндеу

Спикер бұқаралық ақпарат құралдары өкілдерін жол қозғалысы ережелерін сақтаудың маңыздылығы туралы ақпараттық-түсіндіру жұмыстарын кеңінен таратуға шақырды.

Жолды тек жаяу жүргіншілер өткелі арқылы кесіп өту, қауіпсіздік белдігін тағу, балаларға арналған арнайы орындықтарды пайдалану – қарапайым ережелер болғанымен, адам өмірін сақтап қалатын маңызды талаптар.

Балалардың қауіпсіздігі – баршаның ортақ жауапкершілігі. Қоғам болып әрекет еткенде ғана жолдағы қайғылы статистиканы азайтуға мүмкіндік бар.

Бөлісу:

59 рет оқылды