Ташкентте Орталық Азия мемлекетаралық су шаруашылығын үйлестіру комиссиясының 25 жылдығына орай халықаралық ғылыми конференция өтті, деп хабарлайды "Ұлт ақпарат".
Оған бауырлас бес елдің құрылым басшылары, әлемнің ірі қаржы ұйымдары мен ғалымдар және 200-ге жуық сарапшы қатысты. Мамандар ширек ғасырда мемлекетаралық институттың жинаған тәжірибесімен бөлісіп, алдағы бірлесіп атқаратын шаруаларын пысықтады.
Жалпы комиссия ортақ бассейндегі судың өзендерге қажетті деңгейде жетуін реттеп отырады. Соның арқасында Сыр мен Әмударияның сағасында орналасқан елдерде ауыл шаруашылығы саласы қалыпты дамып келеді.
Конференцияда Арал теңізі бассейнін қалпына келтіру, суды үнемді пайдалану, экологиялық ахуалды жақсарту сынды мәселелер көтерілді. Ең бастысы, көп уақыттан бері айтылып келген Өзбекстанмен іргелес жатқан Оңтүстік Қазақстан облысына қарасты үш аудан тұрғындарына Өгем өзенінен ауыз су алу мәселесі түбегейлі шешімін тапты.
"Қазақстанның оңтүстік облысындағы Шардара, Мақтарал, Шымкент қаласының Сарыағаш ауданына қажетті ауыз су мәселесі шешілді. «Өгем» өзенінен өзіміздің еншімізді алу туралы келісімге келдік. Алдағы уақытта соған қажетті іс шаралар жасап, сол елді мекендерді таза ауызсумен қамтамасыз ету мәселесін толық шештік. Бұл да осы комиссияның бір үлкен жетістігі деп санауға болады", - ҚР ауыл шаруашылығы вице-министрі Ерлан Нысанбаев.
1872 рет оқылды
