Фото: Қарағанды облысының әкімдігі
Қарағанды облысы Бұқар жырау ауданы Ботақара ауылында газ баллоны жарылып, екі адам қаза тапты, деп хабарлайды "Ұлт ақпарат".
Қарағанды облысы әкімдігі баспасөз қызметінің мәліметінше, 30 қаңтар сағат 00:07-де Ботақара кентіндегі екі қабатты 12 пәтерлі тұрғын үйдің екінші қабатындағы пәтерде цилиндрлік газ жарылған. Пәтердің үстіндегі шатыр, қабырғалар мен едендер, соның ішінде бірінші қабаттағы пәтерлер толығымен құлаған. Сонымен қатар басқа пәтерлер де ішінара зақымдалған.
"Тұрғын үйде жалпы 46 адам тұрған, жарылыс кезінде 35 адам болды. Апаттық-құтқару жұмыстары кезінде үйінділердің астынан қаза тапқан екі адам және жарақат алған бес адам, оның ішінде үш бала шығарылды.
Жұмыстарға 139 адам және 32 техника жұмылдырылды. Қазіргі уақытта апаттық-құтқару жұмыстары аяқталды.
Аймақтың медициналық мекемелеріне бес зардап шеккен азамат, оның ішінде үш бала жеткізілді. Екі бала амбулаториялық емделуге жіберілді, бір бала облыстық балалар клиникалық ауруханасына қанағаттанарлық жағдайда жеткізілді. Екі ересек пациенттің біреуі өте ауыр жағдайда (80% күйік шалған), екіншісінің жағдайы қанағаттанарлық. Пациенттерге барлық қажетті медициналық көмек көрсетіліп жатыр" - делінген хабарламада.
Әкімдік мәліметінше, оқиға орнында жедел штаб ашылды. Сондай-ақ Қарағанды облысының ТЖД-да (8-7212) 51-72-23 нөмірі бойынша жедел желі телефоны ашылды. 25 тұрғынға шұғыл психологиялық көмек көрсетілді.
236 рет оқылды
