Оңтүстік Қазақстан облысында «Қазақстанның Ұлы Жібек жолына саяхат» халықаралық фестивалі аясында өтіп жатқан екі күндік «Ontustik Tourism. Invest 2017» туристік форумының алғашқы күні қорытындыланды, деп хабарлайды "Ұлт ақпарат" облыс әкімінің баспасөз қызметіне сілтеме жасап.
Форум аясында Оңтүстік Қазақстан облысындағы туризм саласы өкілдері мен Қытай, Өзбекстан және Қазақстанның басқа қалалары арасында 4 меморандумға қол қойылды.
Онда екі жақты әріптестікті нығайту мақсатында «Ontustik Tourism Center» туристік ақпараттық орталығы қытайдың «Salem China» компаниясымен және «Sky Way» туристік компаниясымен меморандум жасалды. Бұдан өзге, Оңтүстік Қазақстан облыстық кәсіпкерлік, индустриалды-инновациялық даму және туризм басқармасы мен Хатай провинциясы меморандум жасасты, «Ontustik Tourism Center» туристік ақпараттық орталығы мен Өзбекстанның туристік өнімін насихаттау орталығы арасында екіжақты меморандумға қол қойылды.
Жалпы алғанда, бұл меморандумдар тараптарға өз аймақтарының туризм өнімдерін бірге дамытып, инфрақұрылымын салуға, инвестиция жұмылдыруға мүмкіндік береді.
Айта кетейік, мұндай деңгейдегі іс-шара Шымкентте алғаш рет ұйымдастырылып отыр. Форум өңірдің туризм саласын дамытуға және тәжірибе алмасуға, өзара тиімді әріптестікті тереңдетуге және шетелдік инвесторларды тартуға бағытталған.
Еске салайық, форумға Қытай Халық Республикасының Мемлекеттік туризм басқармасы жетекшісінің орынбасары Ду Цзян, Қазақстан Республикасы Мәдениет және спорт министрлігінің туризм индустриясы Комитетінің төрағасы М.Мұрзамадиева, Kazakh Tourizm ұлттық компаниясының басқарма төрағасы Р.Күзембаев, «Атамекен» ҰКП қызметкерлері, халықаралық және қазақстандық туроператорлар, инвестициялық компаниялардың, туристік ұйымдармен БАҚ өкілдері, жалпы 500-ге жуық адам қатысты.
1967 рет оқылды
