03 мау, 2023 сағат 13:56

«Өзенмұнайгаздағы» тексеріс кезінде құқық бұзудың 160 дерегі анықталды - ҚМГ

Фото: ozen.kz

«Өзенмұнайгаздағы» тексеріс кезінде 160 құқық бұзушылық пен сәйкессіздік анықталды, деп хабарлайды "Ұлт ақпарат" «ҚазМұнайГаз» ұлттық компаниясына сілтеме жасап.

«Жаңаөзен қаласында ҚМГ арнайы жұмыс тобы тексеріс жүргізуді жалғастырып жатыр. Қазір 55 шаруашылық қызмет нысаны, соның ішінде «Өзенмұнайгаз» АҚ-тың (ӨМГ) 17 өндірістік құрылымдық бөлімшесі, 8 мұнай сервис ұйымы мен 30 басқа да мердігер ұйымның қызметі талданды.

ӨМГ-нің қаржы-шаруашылық қызметін тексеру кезінде алдын ала 160 құқық бұзушылық пен сәйкессіздік анықталды, оның ішінде:

  • 7 факті ҚР заңнамасына сай шаралар қабылдау үшін құқық қорғау органдарына жіберілді;
  • 10 факті бойынша қызметтік тергеу жүріп жатыр;
  • 101 факті бойынша жауапты тұлғаларға тәртіптік жаза қолданылады», - делінген хабарламада.

Құқық бұзушылық фактілерінің салдарынан келтірілген шығын сомасы процессуалды және регламенттеуші іс-шаралардың қорытындысы бойынша белгілі болады.

«Біз құқық қорғау органдарымен тығыз жұмыс істеп, заңға қайшы анықталған әрекеттер жайлы дер кезінде хабарлап отырмыз. Бұдан әрі олар тергеу жүргізіп, өзге іс-шараларды қолға алады. Солардың біріне кеше Экономикалық тергеу департаментінің «Өзенмұнайгаз» бас директорының орынбасарын ұстау фактісі де жатады. Комиссияның жұмысы әлі аяқталмады, көптеген факт бойынша қызметтік тергеулер жүріп жатыр», — деді арнайы жұмыс тобының жетекшісі, ҚМГ Басқарма төрағасының орынбасары Дәулетжан Хасанов.