Тоқаев: Қазақстанда 60-тан аса сербиялық компания жемісті еңбек етіп жатыр

Фото: Ақорда

Ақордада Сербия Президенті Александр Вучичті салтанатты қарсы алу рәсімінен кейін Қазақстан мен Сербия президенттері шағын құрамда келіссөз жүргізді, деп хабарлайды Ult.kz.

Қасым-Жомарт Тоқаев Сербияны Еуропадағы маңызды стратегиялық серіктесіміз деп санайтынын айтты. Қазақстан мен Сербия бірқатар бағытта, әсіресе, экономикалық, мәдени-гуманитарлық салалардағы ықпалдастықты нығайту үшін көп жұмыс атқарды.

"Астана мен Белград арасында тікелей әуе рейсі ашылды. Сауда қатынастарымыз табысты дамып келеді. Қазақстанда 60-тан аса сербиялық компания жемісті еңбек етіп жатыр. Негізгі халықаралық мәселелер бойынша ұстанымдарымыз ортақ. Сондықтан екі ел арасындағы ынтымақтастықтың берік әрі тиімді іргетасы қаланды деп ойлаймын. Сіздің сапарыңыз достық қарым-қатынасымызға тың серпін беру тұрғысынан өте маңызды екеніне сенімдімін", - деді Мемлекет басшысы.

Сербия президенті Александр Вучич қонақжайлық танытқан Қазақстан президентіне алғысын білдірді.

"Қазақстанға ресми сапармен келгеніме қуаныштымын. Қонақжайлық танытқаныңыз үшін ризашылығымды білдіремін. Сіздің пікіріңізбен толық келісемін, елдеріміз арасында шынайы стратегиялық қарым-қатынас орнаған. Сіздің қолдауыңыздың арқасында сауда-экономикалық байланыстарымыз жоғары қарқынмен дамып келеді. Алдағы уақытта жасанды интеллект, ақпараттық технологиялар мен энергетика салаларында ықпалдастық орнату арқылы достығымыз жаңа деңгейге көтеріледі деп ойлаймын. Сізді жақын арада елімізде қарсы алуға дайынбыз", - деді Александр Вучич.