Фото: Optimism.kz
Қазақстан Республикасының Мәдениет және ақпарат министрі Аида Балаева еліміздің барлық мәдениет және өнер саласы қызметкерлерін кәсіби мерекесімен шын жүректен құттықтады, деп хабарлайды Ult.kz.
Министр өзінің құттықтауында Қазақстанның мәдениет саласында атқарылып жатқан істер мен жетістіктерді, сондай-ақ алдағы жоспарларды атап өтті.
«Қазақстанда 7 600 мәдениет мекемесі жұмыс істейді. Бұл қатарға 3 890 кітапхана, 57 театр, 231 архив, 275 музей, 2 994 мәдени-демалыс орталығы, 113 кинотеатр, 36 концерттік ұйым және 4 цирк кіреді. Салада 58 мыңнан астам маман қызмет атқарады. Мәдениет – бұл елдің рухани және тарихи мұрасын сақтаудың, оны халықаралық деңгейде таныстырудың маңызды құралы», – деді министр.
Мәдени мұраның халықаралық деңгейде танылуы
Министрдің айтуынша, Qazaq Culture ақпараттық платформасының іске қосылуы – мәдениет саласындағы ең маңызды бастамалардың бірі. Бұл платформа Қазақстанның мәдениеті мен ұлттық болмысын сегіз тілде таныстырады, оның ішінде қазақ және түрік тілдерімен қатар, БҰҰ-ның ресми алты тілі қамтылған.
Сонымен қатар, 2024 жылы тоғыз республикалық ұйымға «Ұлттық» мәртебе берілуі олардың қызметкерлерінің еңбекақысын 1,75 есеге арттыруға мүмкіндік жасады. Қазақстан халықаралық мәдени жобаларға белсенді қатысып келеді. Мысалы, 60-шы Венеция биенналесінде Қазақстан павильоны ашылып, онда отандық суретшілердің туындылары қойылды. Франциядағы Гиме музейінде «Қазақстан: Ұлы дала жауһарлары» атты көрме өтті, ал Қытайда «Алтын адам және Ұлы дала» көрмесі ұйымдастырылды.
Халықаралық мәдени байланыстарды нығайту
Қазақстанның мәдениет күндері шетелде белсенді түрде өткізілуде. 2024 жылы Тәжікстан мен Түрікменстанда Қазақстанның мәдениет күндері өтсе, Ашхабадта Құрманғазы мен Абайға арналған ескерткіштер орнатылды. Сондай-ақ, Қазақстанда Түрікменстан, Әзербайжан, Армения және Саха Республикасының мәдениет күндері өткізілді.
Еліміздің жас таланттарының жетістіктері
Министр атап өткендей, еліміздің жас өнерпаздары да ұлттық имиджді нығайтуға зор үлес қосуда. 255 қазақстандық өнерпаз 17 мемлекетте өткен халықаралық байқауларда жеңімпаз атанды. «Қазақконцерт» бірлестігі жанынан Мемлекеттік классикалық гитаристер квинтеті мен «Бірлік» ансамблі құрылды.
Тарихи-мәдени мұраны сақтау
Тарихи-мәдени мұраны сақтау мен насихаттау жұмыстары жалғасуда. 2024 жылы «Беташар» дәстүрі ЮНЕСКО-ның материалдық емес мәдени мұралар тізіміне енді. Сонымен қатар, Қазақстан ЮНЕСКО-ға «Жібек жолы: Ферғана – Сырдария дәлізі» және «Маңғыстаудың жерасты мешіттері» жобалары бойынша номинациялық досьелер тапсырды.
Кино және театр саласының жетістіктері
2024 жылы мемлекет қолдауымен 16 ұлттық фильм түсірілді, оның ішінде 7 фильм халықаралық деңгейде 34 марапатқа ие болды. Театрларда 300-ден астам жаңа қойылым сахналанды. Алдағы уақытта кинопрокат саласына арналған «E-Кино» ақпараттық жүйесі енгізілмек.
Болашаққа жоспарлар
2025 жылы елімізде Ұлы Отан соғысындағы Жеңістің 80 жылдығына арналған 2000-нан астам іс-шара, Абайдың 180 жылдығы мен Қазақстан Конституциясының 30 жылдығына орай түрлі мәдени жобалар жүзеге асырылмақ. Сонымен қатар, 51 мәдениет нысанын жөндеу және 250 жаңа нысан салу жоспарланып отыр.
Аида Балаева мәдениет қызметкерлеріне шығармашылық шабыт, толайым табыс және халықтың ыстық ықыласын тіледі.
461 рет оқылды
