Фото: Polisia.kz
Ішкі істер министрлігі азаматтарды қаржылық алаяқтықтан қорғау және дербес деректер қауіпсіздігін күшейту мақсатында Қылмыстық кодекске енгізілген маңызды өзгеріс туралы ескертті, деп хабарлайды Ult.kz.
ҚР Қылмыстық кодексіне жаңа – 232-1-бап енгізілді. Енді өзінің банктік деректемелерін үшінші тұлғаларға бергені үшін, сондай-ақ материалдық сыйақы немесе пайда табу мақсатында басқа біреудің атынан төлемдер немесе ақша аударымдарын жасағаны үшін қылмыстық жауапкершілік қарастырылған.
ІІМ мәліметінше, алаяқтар мұндай деректерді заңсыз жолмен табылған қаражатты қолма-қол ақшаға айналдыру үшін немесе өзге адамдарды алдау мақсатында пайдаланады. Көп жағдайда азаматтар өздерінің қылмыстық схемаға қатысып қалғанын кеш түсінеді.
Министрлік азаматтарға ескертеді:
-
Өз банктік деректеріңізді (карта, IBAN, шот) бөтен адамдарға бермеңіз;
-
«Оңай ақша табу» уәдесіне алданып, картаңызды үшінші тұлғаларға пайдалануға бермеңіз;
-
Күмән тудыратын жағдай болса, дереу банкке немесе құқық қорғау органдарына хабарласыңыз.
Есіңізде болсын: жеке және банктік деректер — тек ақпарат емес, олар сіздің мүлкіңіз, қауіпсіздігіңіз және заң алдындағы жауапкершілігіңізбен тікелей байланысты.
