Бурабайдағы «Балдәурен» орталығында балаларға қауіпті заң бұзушылықтар анықталды

Фото: Baldauren.kz

Бурабай аудандық прокуратурасы РМҚК «Балдәурен республикалық оқу-сауықтыру орталығына» тексеріс жүргізіп, бірқатар өрескел заң бұзушылықтарды анықтады, деп хабарлайды Ult.kz.

Тексеру қорытындысына сәйкес, лагерьдің техникалық паспорты бойынша сыйымдылығы 400 орын болса, іс жүзінде бір ауысымда 574 бала орналастырылған. Бұл рұқсат етілген нормадан 43%-ға артық.

Балаларды сыйдыру үшін 12 оқу кабинеті жатын орынға айналдырылған. Алайда бұл бөлмелер санитарлық тораптармен жабдықталмаған және гигиеналық талаптарға сай келмейді. Сонымен қатар, норма бойынша бір бөлмеге 6 баладан артық орналастыруға болмайды, бірақ іс жүзінде 9 балаға дейін жатқызылған.

Прокуратураның айтуынша, мемлекеттік квота бойынша тегін демалып жатқан балалар тар әрі қолайсыз бөлмелерге жайғасқан. Ал ақылы негізде келген балаларға барлық жағдай жасалған бөлек бөлмелер ұсынылған.

Осыған байланысты прокурорлық қадағалау шаралары қабылданып, жауапты тұлғаларды әкімшілік жауапкершілікке тарту және анықталған заң бұзушылықтарды жою тапсырылды.

Бөлісу:

1698 рет оқылды