29 қыр, 2022 сағат 17:10

Инга Иманбаеваның Президент сайлауына тіркелу өтініші қабылданбады

Инга Иманбаева Орталық сайлау комиссиясына президенттікке үміткер болуға өтініш берді. Дегенмен оның өтініші қабылданбаған, - деп хабарлайды "Ұлт ақпарат" ведомствоның баспасөз қызметіне сілтеме жасап.

"2022 жылғы 29 қыркүйекте Қазақстан Республикасының Орталық сайлау комиссиясына келген азаматша Инга Иманбаева 2022 жылғы 20 қарашаға тағайындалған Қазақстан Республикасы Президентінің сайлауына өзін кандидат ретінде ұсыну туралы мәселені қозғады.

Алайда, Қазақстан Республикасының Президенттігіне кандидаттар ұсыну үшін "Қазақстан Республикасындағы сайлау туралы" Конституциялық заңда көзделіп отырған қажет құжаттар ұсынылған жоқ", - делінген хабарламада.

Орталық сайлау комиссиясы Қазақстан Республикасының Президенттігіне кандидаттар ұсыну "Қазақстан Республикасындағы сайлау туралы" Конституциялық заңның 54 және 55-баптарына сәйкес жүзеге асырылатынын еске салды.

Инганың өзі әлеуметтік желіде кейбір мәселелер бойынша президенттікке кандидаттарға қойылатын талаптарға сай келмейтінін атап өткен. Мысалы, оның мемлекеттік қызметте жұмыс өтілі жоқ.

Айта кетейік, Инга Иманбаева - азаматтық белсенді, тіркелмеген Демократиялық партия жетекшісі Жанболат Мамайдың жұбайы.