07 нау, 2023 сағат 13:42

Сағыз ауылындағы жаппай төбелес: 21 адамға сот үкімі шықты

Атырау облысы Қызылқоға ауданы Сағыз ауылында болған жаппай төбелеске қатысқандарға сот үкімі шықты, деп хабарлайды Sputnik Қазақстан сайты "Мой город" порталына сілтеме жасап.

Оқиға 2021 жылы 30 қазанда болған. Сот үкімі шыққан үш адам кісі өлтіргені және кісі өлтіруге оқталғаны үшін, біреуі денсаулыққа қасақана зиян келтіргені үшін, 10 адам қылмысты біле тұрып жасырғаны үшін, ал бір адам жасырынып қалғаны үшін айыпталды. Қылмыстық істі алқабилер қарады.

"Төбелес кезінде сотталушылардың бірі пышақпен жәбірленушіні иық тұсынан жарақаттаған, сосын екі адамның кеуде тұсынан пышақтаған. Басқа сотталушы тағы бір жәбірленушінің басынан құбырмен соққан. Осы кезде көліктің жанында тұрып, не болып жатқанын бақылап отырған жас жігіт аңшы мылтығынан аспанға бірнеше рет оқ атады Әрі қарай сотталушы аңшылық қаруын көпшілікке қарай көздеп, ер адамға екі рет оқ атқан", — деп хабарлады соттың баспасөз қызметі.

Күдіктілер оқиға орнынан қашып кеткен. Жаппай төбелес салдарынан бір адам қайтыс болып, 6 адам ауыр жараланған. Жәбірленуші тарап сотталушыларға ең ауыр жаза тағайындауды сұрады.

Сотталғандардың бірі 16 жылға, екіншісі 11 жыл, ал үшіншісі бес жылға сотталды. Сондай-ақ 6 адам 4 жылға бас бостандығынан айрылды. Тағы бір айыпты орташа ауырлықтағы денсаулыққа қасақана зиян келтіргені үшін кінәлі деп танылды, бірақ рақымшылық жасалды. Алқабилер кінәсі дәлелденбеген 11 адамды ақтады. Сот үкімі заңды күшіне енген жоқ.