Ақтөбе тұрғыны сот арқылы “Жолаушылар тасымалы” акционерлік қоғамынан лас вагондар үшін моральдық өтемақы өндіріп алды, деп хабарлайды "Ұлт ақпарат".
"Информбюро" жаңалықтар қызметінің хабарлауынша, былтыр тамызда ер адам кәмелетке толмаған қызымен Атырау-Ақтөбе бағытында қатынайтын пойызға билет сатып алады. Пойызға мінгеннен кейін ол вагон санитария талаптарына сай емес екенін көрген.
Жолаушылар шаң, кір, сондай-ақ краннан тот басқан су ағып жатқанына ашуланды. Олар вагон бригадиріне орнын ауыстыру немесе басқа жерге көшіру туралы өтініш айтқанымен, бригадир өтінішті орындаудан бас тартқан. Сөйтіп ер адам көлік полициясының қызметкерлерін шақырады. Оқиға орнына келген қызметкерлер санитария талаптары бұзылғанын байқап суретке және видеоға түсіріп әкеткен. Осыдан кейін талапкер сотқа жүгініп, билеттердің құнын қайтаруды және моральдық шығынды өтеуді талап етті.
"Ақтөбе облысының кәмелетке толмағандар жөніндегі мамандандырылған ауданаралық сотының биыл 12 наурыздағы шешімімен "Жолаушылар тасымалы" акционерлік қоғамынан екі жолаушының әрқайсысына 50 мың теңгеден моральдық шығын және 200 мың теңге өкілдік шығыс өндірілді. Сот шешімі заңды күшіне енген жоқ", – деп хабарлады Ақтөбе облыстық сотының баспасөз қызметінің басшысы Айжамал Сүндет.
520 рет оқылды
_140_110.webp)
