Фото: Gov.kz
Екібастұз қаласы экономиканы табысты әртараптандыру нәтижесінде моноқалалар тізбесінен шығарылды, деп хабарлайды Ult.kz.
Тиісті шешімді ҚР Ұлттық экономика министрлігі қабылдап, моноқалалар тізбесіне өзгерістер енгізді. Бұл жаңарту Мемлекет басшысының 2024 жылғы Жолдауында берілген тапсырмаларды орындау аясында жүзеге асқан.
Жаңа бұйрыққа сәйкес, 2026 жылғы 10 наурызда қабылданған құжат негізінде Екібастұз ресми түрде моноқала санатынан шығарылды.
Министрлік жүргізген кешенді талдау барысында 78 негізгі көрсеткіш қарастырылған. Олардың қатарында өнеркәсіп өндірісінің серпіні, инвестициялық белсенділік, кәсіпкерліктің дамуы және жұмыспен қамту құрылымы бар.
Нәтижесінде Екібастұз экономикасының бір ғана салаға тәуелділіктен арылып, тұрақты әртараптандыру жолына түскені анықталған. Қалада өнеркәсіп көлемі артып, инвестиция тарту қарқыны күшейген.
2025 жылдың қорытындысы бойынша өнеркәсіп өндірісінің көлемі 1,6 трлн теңгеден асып, бір жыл ішінде 28,1%-ға өскен. Ал негізгі капиталға салынған инвестиция 429,8 млрд теңгеге жетіп, өткен жылмен салыстырғанда 1,2 есеге артқан.
Сонымен қатар, жұмыспен қамту бірнеше сала арасында тең бөлініп, қала құраушы бір кәсіпорынға тәуелділік төмендеген. Бұл моноқалаға тән белгілердің жойылғанын көрсетеді.
Жаңартылған тізімде 19 моноқала қалды. Олардың қатарында Теміртау, Жаңаөзен, Рудный, Балқаш және басқа қалалар бар. Осылайша, еліміздегі моноқалалар саны 20-дан 19-ға дейін қысқарды.
Сарапшылардың пікірінше, Екібастұздың тізімнен шығуы – қаланың экономикалық трансформациясының айқын дәлелі. Бұл кәсіпкерлікті дамыту, инвестиция тарту және экономиканы әртараптандыру бағытындағы жүйелі жұмыстың нәтижесі саналады.
_80_80.webp)
