18 қаң, 2023 сағат 10:05

Экобелсенді Грета Тунберг Германияда қамауға алынды

видео кадрлары

Неміс полициясы экобелсенді Грета Тунбергті уақытша қамауға алды. Ол полиция бөлімшесінде бірнеше сағат болған, - деп хабарлайды Tengrinews.kz сайты.

Грета Тунберг 17 қаңтарда Германияның қараусыз қалған Лютцерат ауылы маңындағы көмір шахтасының кеңеюіне қарсы наразылық акциясы кезінде ұсталған.

Тунберг пен басқа демонстранттар жеке басын анықтау үшін полиция бөлімшесіне жеткізілген. Ахен полициясының өкілі Дана Циммерманның айтуынша, ондаған адам ұсталған, алайда олар ресми түрде қамауға алынған жоқ.

Айта кетейік, Лютцераттағы жағдай қаңтар басында шиеленісе түсті. Германиядағы ең ірі қоңыр көмір кеніштерінің бірі Гарцвайлерді кеңейту үшін көшірілген ауылды бұзу жоспарланған болатын. Ауыл тұрғындары RWE концернінен өтемақы алып, бұл елдімекенді әлдеқашан тастап кеткен. Осыдан кейін ол жерге экобелсенділер өз еркімен қоныстанған.

11 қаңтарда полиция белсенділерді Лютцераттан қуып, ғимараттарды бұзу операциясын бастады. Алайда белсенділер қарсылық көрсетті. Германияның түкпір-түкпірінен мыңдаған адам ауылдағы наразылық акциясына жиналды. Табиғатты қорғаушы белсенділер көмір кенішінің кеңеюі қоршаған ортаға зиянын тигізіп қана қоймай, климат жөніндегі Париж келісіміне қайшы келетініне сенімді.