Фото: travelpress.kz
Италияда қазақы ою-өрнек пен киіз үй элементтерімен жасалған «Yurt» атты киімдер топтамасы жарық көрді, деп хабарлайды Ult.kz Travelpress.kz сайтына сілтеме жасап.
Бренд негізін қалаушылар Қазақстанға келіп, елдің танымал туристік орындарында фото және бейне түсірілімдер жүргізген.
«Milang» атты италиялық киім бренді қазақ символикасымен безендірілген алғашқы ерлер топтамасын ұсынды. Брендтің негізін қалаушы – Еуропада ұзақ уақыт бойы тұрып жатқан қазақстандық азамат. Ол бір жылын тек сән үрдістерін ғана емес, өзінің туған жерінің терең мәдени тамырын көрсететін концепция жасауға арнаған.
Италиялық дизайнерді шабыттандырған кең дала, дәстүрлі оюлар мен еркіндік пен жайлылық символы болған киіз үйдің атмосферасы. Топтама өмір салты, саяхат пен табиғатпен үйлесім арасындағы байланысты бейнелеуге бағытталған.
«Алғашқы топтама – түп-тамырға деген құрмет. Yurt – бұл Қазақстанның тарихы. Ол дизайн, текстуралар мен табиғат палитрасы арқылы баяндалады. Топтамаға дәстүрлі қазақ ою-өрнектері, ағаш пен киіз үй бөліктеріндегі көне нақыштардан шабыт алған элементтер кіреді. Киімдегі кестелер мен сәндік тігістер көшпенділердің символдық сызықтарын қайталайды, ал маталардың фактурасы дала халықтарының дәстүрлі киімдерінде қолданылған табиғи материалдарды еске салады. Әрбір деталь ғасырлар бойғы дәстүрлер мен заманауи стиль арасындағы байланысты көрсетеді. Киіз үй сияқты, біз де Гузаль Норматовамен бірлесіп, өнімдерді тек табиғи материалдардан – кашемир, жібек, мақта және табиғи мүйізден жасалған фурнитурадан әзірледік. Бұл киімдерге ерекше сапа беріп, олардың табиғатпен терең байланысын айқындайды», – деп атап өтті «MILANG» брендінің негізін қалаушы Виталий Ланг.
Kazakh Tourism мен Creative Innovation Institute бұл жобаны Қазақстандағы түсірілімдер – «Шымбұлақ» тау-шаңғы курортында және «Шарын» ұлттық паркінде өткізуге қолдау көрсетті.
«Біз әрдайым Қазақстанның табиғи және мәдени байлығын халықаралық индустриялар призмасы арқылы насихаттайтын жобаларды қолдауға қуаныштымыз. «Yurt» топтамасы біздің табиғатымыз бен дәстүрлеріміздің әлемдік сәнге шабыт бере алатынын көрсетеді», – деп атап өтті Kazakh Tourism басшысы Қайрат Сәдуақасов.
1787 рет оқылды
