«Көзге көрінбейтін әлем»

Астана қаласында көру қабілеті нашар жандар мен көру қабілеті қалыпты адамдар арасындағы шекераны жою мақсатында “Көзге көрінбейтін әлем” атты фотокөрме өтіп жатыр, -деп хабарлайды Ult.kz. 

Көрме алғаш рет Ұлыбритания астанасы Лондонда өткізіліп, кейін әлемнің бірқатар қалаларында өтіпті. Ал, елімізде осыған дейін Алматы қаласында 24 қыркүйек пен 24 қазан аралығында болып өткен екен.

Көрменің жалпы мақсаты бәсекеге қабілетті қазақ өнерін дамыту, әлеуметтік-мәдени құндылықтарды көпшілікке жеткізу және көру қабілеті нашар жандарды қоғамда тең құқылы болуын дәріптеу. Бұл туралы көрме ұйымдастырушылары айтып өтті.

«Көрменің жалпы мақсаты көру қабілеті шектеулі жандар мен көру қабілетінде ақау жоқ жандар арасындағы шекараны алып тастау. Осы мақсатта көрмеге он екі суретті алып келдік. Көру қабілеті қалыпты адамдарға көруінде ақауы бар жандардың өмірін сезінуге осы суреттер мүмкіндік береді. Әр суреттің өзіндік тарихы бар», – дейді шараны ұйымдастырушы Canon компаниясының менеджері Алмат Рысқали.

Фотода: Алмат Рысқали, «ÓzgeEpic»

Ұйымдастырушылардың сөзінше «Көзге көрінбейтін әлем» көрмесі көру қабілетіне қарамастан, өнерге қол жеткізуді қамтамасыз ету арқылы осы кедергілерді жоюға ұмтылады.

Осындай көрмелердің маңызды екенін Қазақстан Республикасы Парламенті мәжілісінің депутаты Динара Наумова да айтып өтті. 

Фотода: Динара Наумова, «ÓzgeEpic» 

«Бұл көрме біраз мүмкіндіктердің есігін ашты. Өйткені көру қабілеті шектеулі жандардың өмірі біз үшін жабық дүние болды», -дейді Динара Наумова.

Сондай-ақ, депутат мүмкіндігі шектеулі жандар мен қатар мүгедектігі бар балаларды тәрбиелеп отырған аналардың проблемаларында ескеріп, оларға да ерекше көңіл бөлу керектігін айтып өтті.

Көрменің қызықты ерекшелігі көзі көретін қонақтар өздерін көру қабілеті нашар адамдардың орнына қойып көре алады. Глаукома немесе диабеттік ретинопатия сияқты көру қабілетінің түрлі бұзылыстарын имитациялайтын арнайы симулятор көзілдіріктер келушілерге әлемді басқаша көруге көмектеседі.

Дүниежүзілік денсаулық сақтау ұйымының мәліметі бойынша, әлемде 2,2 миллиардтан астам адам әртүрлі көру кемшіліктерімен өмір сүреді. Ал олардың басым көпшілігі үшін фотография, визуал әлемі мүлдем түсініксіз. Қазақстанда шамамен 160 мың адам осындай шектеулермен өмір сүруде.

Астанадағы көрме аяқталған соң, көрменің бір бөлігі Алматыдағы Әбілхан Қастеев атындағы Мемлекеттік өнер мұражайының бас ғимаратында (Көктем-3 ықшам ауданы, 22/1) орналастырылады.

Дайындаған: Бекболат Мұхтаров

Фотолар: «ÓzgeEpic» креатив хабы өкілдерінен алынды

Бөлісу:

1388 рет оқылды