Фото: primeminister.kz
Астанада экс-шенеунік Ержан Бабақұмаровтың өліміне қатысты қылмыстық іс бойынша сот үкімі шықты. Бұл туралы қалалық соттың баспасөз қызметі хабарлады.
Астана қаласының қылмыстық істер жөніндегі мамандандырылған ауданаралық соты айыпталушыны кінәлі деп танып, оны 11 жыл мерзімге бас бостандығынан айыруға үкім шығарды.
Сот шешімі 2026 жылғы 20 ақпанда қабылданып, заңды күшіне енген. Алайда негізгі сот талқылауы жабық режимде өткендіктен, іс материалдары мен мән-жайына қатысты толық ақпарат жария етілмеді.
Еске салайық, қайғылы оқиға 2025 жылғы 30 қазанға қараған түні болған. Сол түні Ержан Бабақұмаров таныстарының ортасында болғаны айтылады. Кездесу барысында туындаған жанжал соңы төбелеске ұласып, экс-шенеунік ауыр жарақат алып, көз жұмған. Бұл жағдай қоғамда кең резонанс туғызған еді.
Ержан Бабақұмаров әр жылдары мемлекеттік қызметтің түрлі саласында еңбек етті. Ол Қазақстан даму институтының Саяси зерттеулер орталығында, Алматы қаласы әкімінің аппаратында, ҚР Президенті Әкімшілігінде, Мәдениет және ақпарат министрлігінде, Премьер-Министр Кеңсесінде, сондай-ақ Президент жанындағы Орталық коммуникациялар қызметінде қызмет атқарған.
2019 жылдың сәуірі мен шілдесі аралығында ҚР Президентінің кеңесшісі болған. Кейін 2019 жылғы шілдеден 2022 жылғы ақпанға дейін Алматы қаласы әкімінің орынбасары қызметін атқарды. Ал 2022 жылы Президент жанындағы Орталық коммуникациялар қызметінің директоры болып тағайындалған.
Жабық өткен сот процесі мен шектеулі ақпарат қоғамда бұл іске қатысты сұрақтардың әлі де көп екенін аңғартады.
