Фото: Ортком
Астанада Құрманғазы атындағы Қазақ ұлттық халық аспаптар оркестрінің 90 жылдығына арналған мерейтойлық концерті өтті. Бұл туралы Орталық коммуникациялар қызметінде өткен баспасөз отырысында ұйымдастырушылар айтты деп хабарлайды Ult.kz.
"Екі бөлімнен тұратын бұл кеш — ұлттық өнердің терең тарихы мен бүгінгі заманауи тынысын тоғыстырған айтулы мәдени шара болды", - деп отыр Құрманғазы атындағы Қазақ ұлттық халық аспаптар оркестрінің директоры Медет Қуанышев.
Концерт Қазақстан Республикасының Мәдениет және ақпарат министрлігінің қолдауымен ұйымдастырылып, көрермендерге дәстүрлі күйлер мен әлемдік классиканың үндескен ерекше бағдарлама ұсынылды.
Концерт екі бөлімнен тұрады: Бірінші бөлім дәстүрлі күйші-композиторлардың (Құрманғазы, Дәулеткерей, Тәттімбет, Н. Тілендиев, Қ. Ахмедияров, Т. Шәмелов және т.б.) күйлеріне арналған академиялық концерт. Бұл бөлім ұлттық музыканың тереңдігін, байлығын және тарихи маңызын паш етеді. Ал екінші бөлім заманауи бағыттағы шығармалар мен әлемдік классиканы қамтиды. Оркестрге лайықталған бұл туындылар ұлттық дәстүр мен қазіргі заманның үйлесімді үндестігін көрсетеді.
"Бұл концерт арқылы оркестр тарихи және мәдени сабақтастықты насихаттауды, ұлттық өнердің заманауи сахнада жаңаша түрленіп, дамып келе жатқанын көрсетуді мақсат тұтады", - дейді Медет Қуанышев.
1934 жылы академик Ахмет Жұбановтың бастамасымен он бір адамнан құралған Құрманғазы атындағы оркестр бүгінде 90 кәсіби музыкантты біріктіріп, 5000-нан астам ұлттық және әлемдік музыкалық шығармаларды репертуарына енгізіп отыр.
Алдағы уақытта оркестр гастрольдік сапарын Шымкент қаласындағы «Оркестрлер шеруі» республикалық фестивалімен жалғастырады. Сонымен қатар, шымкенттік көрермендерге авторлық жоба - «Оркестр түні» ұсынылмақ.
Ұлттық оркестр – ғасырға жуық уақыт бойы ұлттық музыка мәдениетінің дамуында айрықша рөл атқарып келе жатқан еліміздің басты шығармашылық ұжымдарының бірі. Оркестр репертуары – сан ғасырлық саз мұрамызды бүгінгі буынмен қауыштырудың жарқын көрінісі.
Бұл кеш – тыңдарман қауымға ұлттық рухты сезінуге, күй өнерінің тереңдігін ұғынуға және қазақ музыкасының ғажайып әлеміне саяхат жасауға мүмкіндік береді.
2228 рет оқылды
