26 нау, 2018 сағат 08:45

Бақтияр Адамжан мәскеулік көрермендерді тәнті етті

Танымал қазақстандық әртіс, халықаралық байқаулардың гран-при иегері, «Астана Операның» жетекші солисі Бақтияр Адамжан 24 наурыз күні Мемлекеттік Кремль Сарайында өнер көрсетті (Ресей, Мәскеу). «ҚОЛТАҢБА мен БЕДЕЛ» жобасының аясында аты аңызға айналған әртіс Рудольф Нуреевтің құрметіне орай дарынды биші әрі балетмейстердің 80 жылдығына «Рудольф Нуреев. Өткеннен болашаққа» атты әлемдік балет жұлдыздарының гала-концерті ұсынылды.

Осы кеште Б.Адамжан «Эсмеральда» балетінен (Ц.Пуни музыкасы, А.Ваганованың хореографиясы) «Диана мен Актеон» па-де-десі мен «Париж Құдай анасының соборы» балетінен (М.Жарр музыкасы, Р.Петидің хореографиясы) «Квазимодо мен Эсмеральда» адажиосын орындады. Оның сахнадағы әріптесі Қазақстанның еңбек сіңірген қайраткері, «Астана Операның» жетекші солисі Мәдина Басбаева болды. Мәскеулік көрермен қазақстандық жұпты шаттықпен қарсы алып, әр нөмірінен кейін ыстық ықыласқа бөледі.

Еске салар болсақ, осы рөлдерді бір кездері Рудольф Нуреев асқан шеберлікпен орындаған еді. Ол ХХ ғасырдың ең жарқын бишісі болды. Дәл Нуреевтің өзі ерлер биі саласында нағыз революция жасаған болатын. Ол көзі тірісінде классикалық балетте де, сонымен қатар заманауи хореографияда да бірдей қалыпта қала отырып, аты аңызға айналған тұлға болды.

- Осынау тамаша концерттік бағдарламаға әріптестерім – әлемдік сахнадағы айтулы әртістермен бірге қатысып, өнер көрсету мен үшін үлкен құрмет. Әрине, сөзсіз, бұл осындай мәртебелі жобадағы кездесу қуанышы, тәжірибемен алмасужәне «Астана Опера» театры мен елімізді таныту, - деп атап өтті Бақтияр Адамжан.

Рудольф Нуреевтің мерейтойы құрметіне Мемлекеттік Кремль Сарайының сахнасында дарынды бишіге алғыс-ризашылығын білдіру үшін әлемдік балеттің саңлақтары бас қосты. Концертте бүгінгі таңдағы ерлер классикалық биінің үздік өкілдері қатысты, олардың қатарында: Бақтияр Адамжан (Astana Opera), Иван Васильев (Михайловский театры), Семен Чудин (Ресейдің Үлкен театры), Вадим Мунтагиров (Ковент-Гарден), Денис Родькин (Ресейдің Үлкен театры), Ксандер Париш (Мариин театр), Якопо Тисси (Ресейдің Үлкен театры) бар, сонымен қатар олардың нәзік жанды керемет әріптестері де қатысты.

«Рудольф Нуреев. Өткеннен болашаққа» – Андрис Лиепаның «ҚОЛТАҢБА мен БЕДЕЛ» атты жыл сайынғы жаңа жобасының алғашқы концерті, осы іс-шараның аясында көрермен қауым есімдері мәңгілікке тарих беттеріне енген ХХ ғасырдағы атақты әртістердің шығармашылығымен танысты.