Катарлық Lesha Bank "Бәйтерек" ұлттық холдингімен қазақстандық банкті ықтимал сатып алу туралы келісімге отырды. Бұл туралы "Ұлт ақпарат" Stan.kz ақпарат агенттігіне сілтеме жасап хабарлайды.
Катар қор биржасының ресми сайтында катарлық Lesha Bank инвестициялық банкінің 2024 жылдың 14 ақпанында қазақстандық банкті сатып алу туралы келісімге отырғаны хабарланды. Алайда қаржы институтының нақты деректері көрсетілмеген.
Инвестор банктің барлық жарғылық капиталына ие болатыны белгілі. Сондай-ақ мәміле тараптардың болашақта жасалатын түпкілікті келісімшарттарына байланысты екені атап өтілген.
Холдингтің қоржынына Bereke Bank, Отбасы банк және даму банкі кіреді. Алайда хабарламада қай банкті сатып алып жатқаны айтылмаған.
Lesha Bank (бұрынғы Qatar First Bank) – шариғат қағидаларына сәйкес келетін Катардың қаржы орталығын реттеу басқармасынан мақұлдау алған алғашқы тәуелсіз банк.
Еске салайық, бұған дейін "Қазақтелекомға" тиесілі Tele2 және Altel катарлық инвесторларға өтетіні туралы хабарлаған едік. "Power International холдингі еліміздегі Tele2 және Altel операторларын сатып алмақ.
709 рет оқылды
