Дәрілік заттарды, медициналық мақсаттағы бұйымдарды және медицина техникасын сараптау ұлттық орталығы бас директоры Арнұр Нұртаев Қазақстан шетелден сатып алатын вакциналарға қандай талаптар қоятынын айтып берді, - деп хабарлайды ҚазАқпарат.
«Қазір қоғамда вакцинаға қатысты әртүрлі пікір бар. Қарсы тараптардың бірі «мен екпеге қарсы емеспін, бірақ олар сапалы болуы керек» дегенді алға тартады. Бүгін тағы да Қазақстанға қандай вакциналар әкелінетінін және қалай пайдаланылатынын айтып берейін. Ең бірінші кезекте вакциналарға қойылатын талаптар: олар қауіпсіз әрі қорғаныс иммунитетін көтере алатындай, эпидемиологиялық тұрғыда тиімді болуы керек», - деді Арнұр Нұртаев Денсаулық сақтау министрлігінің онлайн баспасөз мәслихатында.
Арнұр Нұртаев шетелдік вакциналарға қойылатын осы талаптар қалай қадағаланатынын айтып берді. Оның айтуынша қазіргі таңда мемлекеттік тізілімде 64 вакцина тіркелген. Алдын алу екпелерінің ұлттық күнтізбесінде балаларға арналған 11 вакцина бар. Нақтырақ айтқанда балаларға туберкулез, В гепатитті вирус, полиомиелит, көкжөтел, дифтерия, сіреспе, қызылша, қызамық, эпидемиялық паротит, гемофильді және пневмококк инфекциясына қарсы екпе жасалады.
«Вакцинаның қауіпсіздігі мен сапасын біздің Дәрілік заттарды, медициналық мақсаттағы бұйымдарды және медицина техникасын сараптау ұлттық орталығы бағалайды. Вакцинаны мемлекеттік тіркеу кезінде, яғни нарыққа енгізерде бір, тіркеуден өткеннен кейін тағы бір тексереміз. Бұл ретте тұтас сарапшылар тобы жұмыс жүргізеді. Сарапшылар тобы алғашқы кезеңді өндіріс шарттарын бағалаудан бастайды. Бұл кезеңде орталық сарапшылары өндіріс алаңына барып, нақтыланған алгоритм негізінде бағалау жүргізеді. Біз вакцина әзірлейтін кәсіпорынның ішкі өндірістік қауіпсіздігін қайта тексереміз. Ғимараттың талапқа сәйкестігі тексеріледі. Егер біздің стандарттарға сай келмей қалса өндірушімен сол жерде-ақ келісім бұзылады. Мұндай келісімді қытайлық, үндістандық, тіпті еуропалық әріптестерімізбен де бұзғанбыз», - деді ол.
Вакцинаны тексерудің екінші кезеңі – құжаттар сараптамасы. Яғни құжаттардың бәрінің де Қазақстан Республикасының заңнамасына сәйкестігі тексеріледі.
«Біз әу бастан-ақ еуропалық тексеру стандарттарын таңдап алғанбыз. Ол өте қатаң. Ол ережелерді өндірушілердің көбі жақтырмайды. Себебі бұл стандарттардың уақыты тым ұзақ. Алайда бұл жерде мәселе азаматтардың денсаулығына қатысты болғандықтан біз әлемнің үздік стандарттарын таңдаған жөн деп шештік. Үшінші кезең – мамандандырылған (фармацевтикалық және фармакологиялық деп екіге бөлінетін) сараптама. Аталмыш кезеңде вакцинаның шынында да денсаулыққа қауіпсіз және тиімді екенін анықтаймыз», - деді ол.
Мамандандырылған сараптамадан кейін вакциналар аналитикалық сараптамадан өтеді. Төртінші кезеңде вакциналарға қауіпсіз екені туралы қорытынды берілсе, бесінші кезеңде тіркеу куәлігі тапсырылады. Алтыншы кезеңде вакцина тіркеуден өткеннен кейінгі қадағалауда болады.
