Фото: РИА Новости
АҚШ президенті Дональд Трамп Вашингтонның Иранға қарсы әскери операциясы алдағы төрт апта бойы жалғасуы ықтимал екенін мәлімдеді. Ақ үй басшысы бұл туралы Daily Mail басылымына берген сұхбатында айтқан, деп хабарлайды Ult.kz.
Трамптың сөзінше, операция «жоспарға сай» жүріп жатыр. Ол АҚШ соққылары нәтижесінде Иран басшылығының 48 өкілі жойылғанын алға тартты. Сонымен қатар америкалық лидер Иранмен келіссөз жүргізуге дайын екенін білдірді, алайда оның қашан өтетініне нақты жауап бере алмады.
«Олар келіссөз өткізгісі келеді. Бірақ мен оларға: “Өткен аптада сөйлесу керек еді, қазір емес” дедім», – деді Трамп.
Екі тәулікте екінші рет халыққа үндеу жасады
1 наурыз күні Ақ үй басшысы америкалықтарға арнап тағы бір мәлімдеме жасап, қаза тапқан үш әскери қызметкер үшін «кек қайтаруға» уәде берді. Ол Тегеранға жаңа ультиматум қойып, АҚШ азаматтарын өзінің «еркіндік жолындағы күресін» қолдауға шақырды. Бұл – соңғы 48 сағат ішіндегі екінші үндеу.
Бұған дейін The Atlantic басылымына берген сұхбатында Трамп Иран билігін «тым ұзақ күтті» деп айыптаған. Оның айтуынша, соңғы апталарда Вашингтон байланысқа шыққан ирандық келіссөз жүргізушілердің кейбірі әуе соққылары салдарынан қаза тапқан.
Израиль мен АҚШ-тың Иранға қарсы операциясы
28 ақпан күні таңертең Израиль мен АҚШ Тегеранға және Иран аумағындағы өзге нысандарға соққы жасады. Трамп Ислам Республикасының ядролық бағдарламасын жою ниетін мәлімдеп, Иран әскерін қаруын тастауға, ал халықты «тағдырын өз қолына алуға» шақырды.
Өз кезегінде Иран Израиль аумағына және Таяу Шығыстағы бірқатар нысандарға соққы жасады. АҚШ Қарулы күштерінің Орталық қолбасшылығы бастапқыда америкалық нысандарға келтірілген залал «мардымсыз» екенін хабарлаған. Алайда 1 наурызда ирандық соққылар салдарынан үш америкалық әскери қызметкердің қаза тауып, бесеуінің ауыр жараланғаны мәлім болды.
Иран тарапы әскери операцияның екінші күні елдің жоғарғы жетекшісі аятолла Али Хаменеи мен бірқатар жоғары лауазымды күштік құрылым өкілдерінің, соның ішінде қорғаныс министрі Азиз Насирзаде мен Ислам революциясы сақшылар корпусының қолбасшысы Мохаммад Пакпурдың қаза тапқанын растады.
