20 қар, 2025 сағат 16:05

Уақыт өзгерді, мәселе қалды: ШҚО-дағы жарықтандыру жайы қашан шешіледі?

Фото: Ортком

Қазақстан аумағында уақыт белдеуінің ауысқанына екі жылға жуықтап қалды. Күннің ерте атып, ерте батуы әсіресе шығыс халқына қолайсыздық туғызды. Осы уақыт ішінде Шығыс қазақстандықтар қараңғыда жүруге мәжбүр екендерін айтып, шағымданумен келеді. Себебі облыстағы ауыл-аймақ, ірілі-ұсақты қалалардың өзінде көшелер толық көше шамдарымен қамтылмаған. Сондықтан Ult.kz тілшісі «Шығыс Қазақстан облысының әлеуметтік-экономикалық дамуы туралы» брифингте облыс әкімі Нұрымбет Сақтағановтан көшелерді жарықтандыру мәселесі төңірегінде сұрап білді.

Ult.kz: Уақыттың өзгеруіне байланысты күн ерте бататындықтан халық көшелердің дұрыс жарықтандырылмағанына шағымданып жатыр. Бұл мәселе неге әлі күнге дейін шешімін таппай келеді? Көшелердің жарықтандырылуын ретке келтіру жоспарда бар ма?

Нұрымбет Сақтағановтың айтуынша бұл мәселе көшелерді жарықтандыру жобасын жасауға міндеттелген мекеменің заң бұзуынің себебінен мәселе шешілмей жатыр.

«Көшелерді жарықтандыру мәселесі сағаттың өзгеруіне байланысты емес, Еуропалық қайта құру және даму банкі уақытында тиісті жарықтандыру мәселесін модернизация жасау жобасын іске асырған. Сол жобаны іске асыру кезінде кей бір келеңсіздіктер, заң бұзушылықтар болып, оған қатысты адамдар тиісті жазаларын алып, сотталды. Қазіргі таңда көшелердегі жарықтың өшуі 20 пайызға дейін болған, соны біз 5 пайыздан аздау жағдайға жеткізу үшін тиісті жұмыстарды жүргізіп жатырмыз. Рет-ретімен бұл мәселе толық шешілетін болады», ‒ деді Нұрымбет Сақтағанов.

Ал тілші бұл мәселе қай уақытқа дейін шешілетінін нақтылап сұрғанда, әкім қаланың жарықтандыру мәселесі 2026 жылдың бірінші жарты жылдығында шешіліп қалатынын жеткізді.