Фото: Gleb Garanich / Reuters
Владимир Зеленский кеңсесінің бұрынғы басшысы Андрей Ермакты сот 60 тәулікке қамауға алу туралы шешім шығарып, оған 140 млн гривен (шамамен 3,1 млн доллар) көлемінде кепілмен босап шығу мүмкіндігін берген болатын. Ермак мұндай қаражаты жоқ екенін, алайда достары көмектеседі деп үміттенетінін айтты, деп хабарлайды Ult.kz.
«Бұған дейін де айттым, менде мұндай ақша жоқ. <...> Мен бұған дайындалған жоқпын. Таныстарым, достарым жеткілікті деп ойлаймын, олар көмектесе алады деп үміттенемін», – деді Ермак сот шешімі жарияланғаннан кейін журналистерге.
Сондай-ақ ол адвокаттарының апелляциялық шағым түсіретінін мәлімдеді.
Фото: REUTERS / Alina Smutko/ Андрей Ермак сотта
Айта кетейік,дүйсенбі күні Украинаның Мамандандырылған сыбайлас жемқорлыққа қарсы прокуратурасы Андрей Ермакқа Киев маңындағы элиталы тұрғын үй құрылысы кезінде ақшаны жымқырды деген айып тағылғанын хабарлады. Келесі күні Жоғары антикоррупциялық сот (ВАКС) Ермакқа қатысты бұлтартпау шарасына көшті.
САП басшысы Александр Клименко ведомство Ермакты 4,1 млн доллар көлемінде кепіл қою мүмкіндігімен қамауға алуды сұрайтынын мәлімдеген болатын. Алайда сот кепіл көлемін 3,1 млн долларға түсіру туралы шешім шығарды.
Бейсенбі күні судья өз шешімінің тек қарар бөлігін ғана оқыды. Шешімнің қандай уәждерге негізделгенін түсінуге мүмкіндік беретін толық мәтін 18 мамырда жарияланады деп күтілуде.
Андрей Ермак — украиналық заңгер, кәсіпкер және саясаткер. Ол 2020–2025 жылдары Президент кеңсесін басқарды. Кейін жемқорлық схемаларына қатысты тергеуге түсті.
72 рет оқылды
