Мемлекет басшысының өкімімен Ардақ Әшімбекұлы Қазақстан Республикасы Мемлекеттік күзет қызметі бастығының орынбасары – Айрықша мақсаттағы күштердің қолбасшысы болып тағайындалды.
Бұл туралы "Ұлт ақпарат" Ақордаға сілтеме жасап хабарлайды.
Ардақ Әшімбекұлы 1977 жылы 1 мамырда дүниеге келді.
1995 жылы Қазақстан Республикасы Ұлттық қауіпсіздік комитеті Шекара әскерлерінің Әскери институтына түсіп, 1999 жылы «бөлімшелердің қызметтік-жауынгерлік іс-әрекеттерін басқару» мамандығы бойынша бітірген. Сондай-ақ 2014 жылы Қазақ гуманитарлық заң университетін «құқықтану» мамандығы бойынша тәмамдаған.
1999-2001 жылдары ҚР Республикалық ұланының қатарында офицерлік лауазымдарда болған. 2001-2006 жылдары Қазақстан Республикасы Президенті Күзет қызметінде түрлі офицерлік басшылық лауазымдарда қызмет атқарған.
2006 жылдан Қызметтің әртүрлі құрылымдық бөлімшелерін басқарған.
2013 жылдан ҚР Президенті Күзет қызметі Бастығының бірінші орынбасары - Президентінің қауіпсіздік қызметінің бастығы болды.
2014 жылдан Қазақстан Республикасы Мемлекеттік күзет қызметі бастығының орынбасары - Қазақстан Республикасының Тұңғыш Президенті - Елбасының қауіпсіздік қызметінің бастығы болып тағайындалды.
2019 жылдың маусымынан осы тағайындауға дейін. Қазақстан Республикасы Мемлекеттік күзет қызметінің басшысының бірінші орынбасары – Қазақстан Республикасы Тұңғыш Президенті – Елбасы Күзет қызметінің басшысы болды.
ІІ дәрежелі «Айбын» орденімен, «ҚР ҰҚК Әскери институтына 75 жыл» арнаулы мерейтой төсбелгісімен, ҚР Президентінің атынан және Қызмет басшылығынан алғыстармен, 8 медальмен, Қазақстан Республикасы Президенті Күзет қызметінің Құрмет грамотасымен марапатталған.
