Фото: Ақорда
Қазақстан мен Түрікменстан арасындағы ынтымақтастықты нығайту мақсатында Түрікменстан Халк Маслахатының Төрағасы Гурбангулы Бердімұхамедов Түркістан қаласына ресми сапармен келді, деп хабарлайды Ult.kz.
Қазақстан Президенті Қасым-Жомарт Тоқаев мәртебелі мейманды Қожа Ахмет Ясауи кесенесінде қарсы алып, қасиетті нысанның рухани мән-маңызын таныстырды.
Екі ел басшылары әйгілі ойшылдың рухына тағзым етіп, Құран бағыштады. Кесенеде жүргізіліп жатқан реставрациялық жұмыстардың барысымен танысқан мәртебелі меймандар бұл нысанның түркі әлеміндегі рухани бірліктің символы екенін атап өтті.
Фото: Ақорда
Этноауыл мен ұлттық мәдениетке саяхат
Қасым-Жомарт Тоқаев пен Гурбангулы Бердімұхамедов «Әзірет Сұлтан» музей-қорығы аумағындағы этноауыл кешеніне барып, қазақтың ұлттық дәстүрлері мен мәдениетінен сыр шертетін көріністерді тамашалады.
Этноауылда олар шығыс базарымен танысып, ұлттық тағамдар мен қолөнер туындыларын көрді. Ағаш ою, кілем тоқу, киіз басу сияқты қазақ халқының дәстүрлі қолөнер шеберліктері ерекше қызығушылық тудырды. Сондай-ақ, қыран құстар мен тазыларды көру сапардың әсерлі сәттерінің бірі болды.
Фото: Ақорда
Turkistan визит орталығындағы тарихи танысу
Сапар барысында меймандар Turkistan визит орталығында болды. Бұл жерде Қасым-Жомарт Тоқаев пен Гурбангулы Бердімұхамедовке «Күлтөбе» қалашығының археологиялық зерттеулері мен оны музейге айналдыру жөніндегі жобалар таныстырылды. Қалашықтың 27 гектар аумағында археологиялық қазба жұмыстары аяқталған.
Сонымен қатар таяуда ашылатын «Қолөнершілер қалашығының» тұжырымдамасы таныстырылды. Оның ішінде шеберханалар, ұлттық тағам түрлерін ұсынатын орындар, шығыс базары және шағын қонақ үйлер орналаспақ.
Осы орайда биыл 25 наурызда Түркістанға World Craft Council халықаралық ұйымының шешімімен «Қолөнершілер қаласы» деген мәртебе берілгенін атап өткен жөн.
Бұдан бөлек, визит орталықта Қазақстан Президенті мен Түрікменстанның Ұлт көшбасшысы Қожа Ахмет Ясауи кесенесіндегі бірегей тарихи жәдігерлермен танысты.
Фото: Ақорда
Сапардың маңызы
Бұл сапар Қазақстан мен Түрікменстан арасындағы тарихи-мәдени байланыстарды тереңдетуге, екі елдің рухани бірлігін нығайтуға бағытталған қадам ретінде бағаланады. Түркістан түркі әлемінің мәдени орталығы ретінде айрықша орын алып, екі елдің әріптестігін жаңа деңгейге көтеруге негіз болды.
1112 рет оқылды
