Фото: Азамат Құсайынов
Алматыда Ұлттық кітапханада ақын, аудармашы, Қазақстанның Халық жазушысы Тұманбай Молдағалиевтің 90 жылдық мерейтойына орай «Жүрегі жырдан жаралған» атты әдеби-музыкалық кеш өтті, – деп хабарлайды Ult.kz.
Салтанатты шараға кітапхана оқырманы, БАҚ өкілдері мен зиялы қауым, сондай-ақ ақынның өмірлік жары Күлтай Қасымова мен туыстары қатысты.
Фото: Азамат Құсайынов
«Бүгін осы кітапханада Тұманбай ағаларыңа арнап 90 жылдық тойдың басын сіздер бастап жатырсыздар. Көп рақмет айтамын! Мен не айтамын, тек қана ол кісінің өзі болып, араларыңда жарқырап отырса, тіпті жақсы болар еді. Бір өкініштісі сол ғана. Өзі "сен артымда қал" дей беруші еді. Бұл отбасының ошағын сөндірмей, бала-шағасына ие болсын дегені екен ғой. Біз қол ұстасып, өмір бойы баратын жердің бәріне бірге бардық. Қазақстанның ішін де, шетелді де бірге араладық. Сіздердей оқырманы, халқы бар, біздің Тұмекең бақытты ақын деп білемін», – деді Күлтай апай.
Кезінде бір топ жас Тұманбай Молдағалиевтың шәкіртіміз деп, үйіне барып, асын ішіп, әдебиетті бірге жасаған көрінеді.
Фото: Азамат Құсайынов
Сол азаматтардың бірі – композитор Ержан Белғозиев. Ол ақынның мерейтойлық шарасына арнайы қатысып естеліктерімен бөлісті.
«Біз Тұмағаңның шәкіртіміз, Тұмағаңның шенеуінен шықтық деп айтамыз. Бізді табыстырған өлең. Соның арқасында біз де Тұмағаңның отбасының мүшесіндей болып кеттік. Кез келген уақытта келеміз, түн-күнге қарамай Күлтай тәтеміз ас-шайын беретін. Тұмағаңмен араласып жүргенде бізді саяжайына алып баратын. Соған жас ақындардың басын қосып, әңгіме айтамыз, әдебиетті, поэзияны талқылаймыз. Сөйтіп жүргенде неше түрлі әндер, не түрлі шығармашылық туындылар туып жатты. Сол арқылы қазақ әдебиетінің өзіндік бір кезеңін, өзіндік бір буынын қалыптастырды ағамыз», – дейді композитор Ержан Белғозиев.
Осылайша Қазақстанның Халық жазушысы Тұманбай Молдағалиевтің 90 жылдық мерейтойы ән-жыр кешімен жалғасты.
Қазақтың біртуар ақыны Тұманбай Молдағалиев 1935 жылы 20 наурызда Алматы облысы, Еңбекшіқазақ ауданы, "Жарсу" кеңшарында дүниеге келіп, 2011 жылы 10 қазанда Алматыда қайтыс болды.
Оның тұңғыш өлеңі "Украина қызына" 1954 жылы жарияланып, алғашқы өлеңдер жинағы "Студент дәптері" 1957 жылы жарық көрді.
Тұманбай Молдағалиев нәзік сырлы, ойлы да отты жырлармен танылды. Сондай-ақ Тұманбай Молдағалиев көптеген ән мәтіндерінің авторы. Ол "Құстар қайтып барады", "Құстар әні", "Куә бол", "Бақыт құшағында" сынды танымал әндерге сөз жазған.
«Жүректегі жазулар» өлеңдер жинағы үшін Қазақстан Республикасының Абай атындағы Мемлекттік сыйлығын, Халықаралық Физули сыйлығының лауреаты атанған.
