Қанатын кеңге жайған конкурс: бәсеке жаңа белеске көтерілді

Фото: МАМ

Қазақстан Республикасы Мәдениет және ақпарат министрлігінің қолдауымен өтетін Халық қаһарманы Роза Бағланова атындағы халықаралық вокалдық конкурс жаңа қарқын алып, ауқымы мен маңызын айқын танытып отыр. Биыл екінші мәрте ұйымдастырылып отырған өнер додасына деген қызығушылық артып, 150 қатысушының өтінімі қабылданды.

Бұл нәтиже жобаның кәсіби ортадағы беделінің нығайып, шығармашылық бәсекенің жаңа деңгейге көтерілгенін көрсетеді. Конкурсқа Қазақстанның әр өңірімен қатар, Түркия, Беларусь, Өзбекстан және Қырғызстаннан да қатысушылар өтінім жолдап, оның халықаралық деңгейін айшықтай түсті.

Өтінім қабылдау кезеңі 8 сәуірде аяқталды. Қазіргі таңда конкурс іріктеу кезеңіне өтті. Алғашқы онлайн іріктеу кезеңі 8–17 сәуір аралығында өтеді. Бұл кезеңде қатысушылардың кәсіби деңгейі жан-жақты сараптан өтеді. Екінші кезең 13 мамыр күні офлайн форматта ұйымдастырылып, іріктеуден өткен үздік қатысушылар үлкен сахнада бақ сынайды.

14 мамыр күні байқау қорытындысы шығарылып, Гала-концерт барысында жүлдегерлердің есімдері ресми түрде жарияланады.

Ұлттық мәдениеттің айрықша оқиғасына айналған бұл жоба - аты аңызға айналған өнер иесі Роза Бағланованың бай мұрасын ұлықтап, оның шығармашылығын жаңа буынға кеңінен танытуға бағытталған бірегей мәдени платформа.

Конкурсты Роза Бағланова атындағы «Қазақконцерт» мемлекеттік академиялық концерттік ұйымы ұйымдастырады.

Бөлісу:

447 рет оқылды