20 ақп, 2024 сағат 14:38

Қазақстандық мектептерде құлшылыққа арналған орындар ашыла ма – министр жауап берді

Мектептерде ешқандай діни рәсім өтпеуі керек. Оқу-ағарту министрі осылай деп мәлімдеді. Бұл туралы "Ұлт ақпарат" Stan.kz ақпарат агенттігіне сілтеме жасап хабарлайды.

Оқу-ағарту министрі Ғани Бейсембаев үкімет отырысының кулуарында мектеп діни рәсімдерге арналмағанын айтты. Брифингте журналистер министрге мектептерде намаз оқуға арналған орындар бөлу туралы пікірге көзқарасы қандай екенін сұрады.

“Мектеп сапалы білім мен тәрбие беруге арналған орын”, – деп атап өтті министр.

Сонымен қатар ол, болжам бойынша, сабақ кезінде жұма намазын оқып жатқан оқушылардың видеосына пікір білдірді.

“Мектепте ешқандай діни рәсім өтпеуі тиіс, ол әр мектептің ішкі ережесінде жазылады және министрліктің бұйрығымен реттеледі. Соған қарамастан қазір біз бұл жағдайды талдап жатырмыз, әзірге қай өңірде, қай мектепте болғаны белгісіз”, – деді министр.

Бұған дейін мектепте намаз оқыған оқушыларға қатысты тексеріс бастағаны белгілі болған еді.