Фото: ЖИ
Креативті индустрияны дамыту – мемлекеттің басты стратегиялық бағыттарының бірі. 2029 жылға дейінгі Ұлттық даму жоспарының маңызды тармағына енген бұл сала Мемлекет басшысының ерекше назарында. Қазақстан креативті экономиканы қолдау арқылы жаңа жұмыс орындарын ашып, инновацияларды дамытуды және әлемдік деңгейде өз имиджін көтеруді көздейді, деп хабарлайды Ult.kz.
Жаңа заң және қор құрылуы
Биыл "Креативті индустрияларды дамыту туралы" Заң қабылданып, саладағы мемлекеттік және жергілікті органдардың құзыреті кеңейтілді. Сонымен қатар, Үкімет жанынан Креативті индустрияларды дамыту қоры құрылмақ. Бұл қор талантты азаматтарды қолдап, инфрақұрылым мен экспорттық мүмкіндіктерді дамытуға бағытталған. Қор жобаларды қаржыландыруға лотерея табысының 3%-ын пайдалану ұсынысын қарастыруда.
"e-Creative" платформасы және хабтар жүйесі
Қазақстанның ірі қалаларында 12 креативті хаб жұмыс істеп тұр, ал 2025 жылға дейін тағы 8 хаб ашу жоспарланған. Сондай-ақ, "e-Creative" бірыңғай реестрі іске қосылып, креаторлардың жобаларын автоматтандыру және тәжірибе алмасу мүмкіндігі кеңейтіледі.
Салықтық жеңілдіктер және экспортты қолдау
Креативті саланың 40 қызмет түрі арнайы салық режиміне енгізіліп, кәсіпкерлерге жеңілдіктер ұсынылды. Нәтижесінде, тіркелген субъектілер саны 15%-ға артты. Қазақстандық креативті өнімдерді халықаралық нарыққа шығару үшін арнайы маркетплейс платформасы іске қосылуда.
Қазақстанның жаһандық жетістігі
2024 жылы Қазақстан Global Innovation Index рейтингінде "Креативті тауарлар мен қызметтер" көрсеткіші бойынша 93-орыннан 65-орынға көтерілді. Бұл – мемлекеттік қолдау мен жүйелі жұмыстың нәтижесі. Әлемдік деңгейде танылған Димаш Құдайберген, DJ Imanbek, Тимур Бекмамбетов сынды тұлғалар елдің креативті индустриясының беделін асқақтатуда.
