Фото: ІІМ
Шымкент қаласында полиция қызметкерлері алдын ала жоспарланған схема бойынша әрекет еткен пәтер ұрыларын құрықтады. Бұл туралы Ішкі істер министрлігінің баспасөз қызметі хабарлады.
Тергеу деректеріне сәйкес, күдіктілер – Алматы облысынан келген үш азамат. Олар қала аумағында бірнеше мәрте ұрлық жасап үлгергені анықталған.
Қылмыстық әрекеттер барысында топ мүшелері иелері жоқ үйлерді аңдып, көбіне түнгі уақытта ішке заңсыз кіріп отырған. Ұрланған заттардың қатарында қолма-қол ақша мен алтын бұйымдар бар.
Ерекше назар аударатын жайт – күдіктілер өзара байланыс орнату үшін рация қолданған. Бұл арқылы олар бір-бірімен үздіксіз хабарласып, рөлдерді алдын ала бөлісіп, жағдайды бақылап отырған.
Жедел-іздестіру шаралары нәтижесінде барлық күдіктілер ұсталып, уақытша ұстау изоляторына қамауға алынды. Қазіргі уақытта аталған дерек бойынша сотқа дейінгі тергеу амалдары жүргізілуде.
Полиция азаматтарға тұрғын үйлердің қауіпсіздігін күшейтіп, сақтық шараларын қатаң сақтауға кеңес береді.
Айта кетейік, бұған дейін Алматыда да төтенше жағдайды пайдаланып ұрлық жасаған адамдар тобы ұсталған болатын.
