26 жел, 2025 сағат 16:21

Фукуок – Алматы рейсі әуежайға қайта оралды: әуе компания түсініктеме берді

Фото: ашық дереккөз

Air Astana әуе компаниясы Фукуок – Алматы бағытындағы KC 162 рейсінің кешігуіне байланысты түсініктеме берді, деп хабарлайды Ult.kz.

Компанияның мәліметінше, 26 желтоқсанда аталған рейсті орындаған әуе кемесі борттағы барлық дәретхананың істен шығуына байланысты ұшып шыққан әуежайына қайта оралуға мәжбүр болған. Ұшақ жергілікті уақыт бойынша сағат 10:04-те әуеге көтеріліп, 14:14-те қауіпсіз түрде қонған.

Қазіргі уақытта әуе кемесіндегі ақауларды жою жұмыстары жүргізіліп жатыр. Осыған байланысты рейстің ұшуы 27 желтоқсанға, жергілікті уақыт бойынша сағат 04:00-ге дейін кейінге қалдырылды.

Әуе компаниясы жолаушыларға ыстық тамақ пен сусындар ұсынғанын, сондай-ақ оларды қонақ үйге жеткізу және орналастыру мәселелерімен айналысып жатқанын хабарлады.

Air Astana рейстің кешіктірілуіне байланысты жолаушылардан кешірім сұрады.