Фото: Pexels.com
Сенатор Жанна Асанова жастарды өз бетінше өмір сүруге дайындау мақсатында мектеп бағдарламасына өмірлік дағдылар бойынша курстар енгізуді ұсынды, деп хабарлайды Ult.kz.
Қазіргі балалардың көп уақыты сан әлемінде өтеді, соның салдарынан өз бетінше өмір сүру үшін қажетті негізгі тұрмыстық және әлеуметтік дағдыларды меңгеру деңгейі төмендеп барады. Сенатор Жанна Асанова өз депутаттық сауалында осы мәселе туралы мәлімдеді. Оның айтуынша, мектепте тәжірибелік дағдыларды меңгермеу балалардың жеке дербестігіне ғана емес, отбасылық институттың тұрақтылығына да әсер етеді.
Сенатор осыған байланысты орта және жоғары сынып оқушыларына арналған өмірлік маңызы бар дағдыларды дамытатын пәндерді оқу бағдарламасына енгізуді ұсынды.
«Балалардың күннің көп бөлігін мектепте өткізетінін ескере отырып, орта және жоғары сыныптарға қосымша пәндерді енгізу орынды болар еді. Бұл пәндер тұрмыстық дағдыларды, ағаш шебері мен ұсталық өнерді, алғашқы медициналық көмек көрсету, төтенше жағдайлардағы қауіпсіздік ережелерін, өзін-өзі қорғау негіздерін, сондай-ақ құқықтық және қаржыға сауатты болуды қамтуы тиіс. Сонымен қатар, қаржыға сауатты болуды бастауыш сыныптан бастап оқыту қажет», – деп атап өтті сенатор Жанна Асанова.
2654 рет оқылды
