Фото: Polisia.kz
Өскеменде тәртіп сақшылары жылдам әрі үйлесімді әрекетінің арқасында ана мен баланың өмірін сақтап қалды. Бұл туралы Ult.kz хабарлады.
Оқиға 17 шілде күні сағат 14:20 шамасында болған. "102" жедел арнасына қала тұрғыны Үлбі өзенінде танысының қызы мен бірге суға түсіп, қатты ағысқа ілесіп кеткені туралы хабар берген. Дабыл түскен сәтте кезекші көмекшісі Олжас Оразов жедел әрекетке көшіп, жақын маңдағы патрульдік полиция экипажына нақты координаттар бойынша бағыт берді.
Оқиға орнына патрульдік полиция батальоны ротасының командирі Мадияр Мұхамеджанов басқаратын №9 экипаж дереу жеткен. Сол сәтте Үлбі полиция бөлімінің криминалдық полиция бастығының орынбасары Сұңғат Сейілжанов та жақын маңда болып, дербес түрде өзенге жетіп, бірден суға секіріп, анасы мен баланы құтқаруға ұмтылды.
Судың қатты ағысына қарамастан, Сейілжанов ана мен баланы су бетінде ұстап тұра алды. Артынша Мұхамеджанов та көмекке келіп жетті. Алайда ағыс күшті болғандықтан, өз күштерімен жағаға шығу мүмкін болмады. Полицейлер құтқарушылардың қайықпен келуін күтіп, сол сәтте де адамдардың қауіпсіздігін қамтамасыз етті.
Үйлесімді қимыл мен жедел шешімнің арқасында қайғылы жағдайдың алдын алу мүмкін болды. Қазіргі уақытта анасы мен қызының өміріне ешқандай қауіп жоқ. Оқиғаның мән-жайы анықталып жатыр.
